Анализа на финансиски извештаи

Доколку ги поминавте лекциите по финансиско сметководство по препорачаниот ред, верувам дека научивте да ги подготвувате основните финансиски извештаи: билансот на состојба, билансот на успех и извештајот за готовински текови. И тука вообичаено работата на повеќето македонски сметководители завршува. Книговодствената евиденција и изработката на финансиските извештаи објаснети во претходните лекции влегуваат во доменот на задолжителното сметководство, но покрај задолжителното сметководство постои и друга научна дисциплина, која се нарекува менаџерско или управувачко сметководство. Менаџерското сметководство се води на доброволна основа и се занимава со користење и анализа на сметководствените податоци за донесување на деловни одлуки.

Анализата на финансиските извештаи, на пример, се врши на доброволна основа и како таква верувам дека ретко се применува во нашите претпријатија. Додека пак, во развиениот свет секој кој се нарекува сметководител треба да знае да ги анализира финансиските извештаи. Кај нас сите работи кои се нови и непознати, најчесто се отфрлаат како непотребни,  но се надевам дека има лица кои сакаат да ги прошират своите знаења и преку овие часови ќе се обидам да ги објаснам основните техники на анализа на финансиските извештаи преку практични примери, кои верувам дека секој менаџер или сметководителот којшто работи за него би требало да ги знае.

Основните техники на анализата на финансиските извештаи се хоризонталната анализа, вертикалната анализа и анализата на финансиски индикатори.

А финансиските индикатори може да ги поделиме на:

• Индикатори на ликвидност;
• Индикатори на профитабилност;
• Индикатори на деловна активност;
• Индикатори на финансиска структура;
• Индикатори на пазарна вредност.